عن "العيش خارج جلدك"

صديقتي على الفيس بوك رنا كتبت عن مواصفات البنات في خيال الناس البنت اللي لازم تقف ادام المراية ساعتين قبل ما تنزل ولا تقعد بعد دراستها تتعلم تبقى ست بيت أو إن لازم البنت تبقى إجتماعية ورغاية ..

مجتمعنا أوقات بيدفعنا إننا نعيش برة جلدنا وجوة القوالب اللي هما مجهزينها .. إنت ولد يبقى لازم تعمل كذا وكذا ويبقى شكلك كذا وكذا وتلبس كذا وتتكلم بالطريقة الفلانية وتتصرف زي الألف وماتعملش كذا ولا كذا إنت راجل !!

والبنت لازم تاخد بالها من شكلها ولبسها وكل يومين تنزل تشتري ميك أب وإكسسوارات ولبس على الموضة وتاخد بالها من كلامها وطريقة مشيتها وطبقة صوتها وضحكتها ورغاية واجتماعية ومتقفلش على نفسها وبتعرف تكوي وتطبخ وتخيط وتشتغل برة كمان ..

كل واحد بيتولد بجلده وواحدة واحدة بيتسلخ منه عشان يتحط في القالب اللي متجهزله. فكرة إنك تختلف عنه دي تعتبر جنان وإنك يبقى ليك شخصيتك ده خرق للطبيعة المجتمعية.

ماتخرجش برة جلدك وتعيش في قالب حد تاني مش هيساعك يا هيبقى واسع عليك يا ضيق ويضيق عليك حياتك. ربنا خلقك كده مختلف عن كل البشر أه فيك من أهلك حاجات بحُكم الجينات لكن مش معناه أبداً إن الجينات دي بتحملك شكل حياتك هايبقى إزاي وإلا هانتحاسب على إيه في الآخرة؟! :)

ساره عاشور