الأحد، 24 يونيو، 2012

باهت



عن الإحساس الباهت بالحياة الباهتة والمشاعر الباهتة اللي بتخرج من قلوب باهتة وناس باهتة مفيهاش حياة !

عن الحضور الباهت ..

الحضور اللي تحسه بيمص منك الحياة أكتر ما بيديلك
الحضور اللي فيها عيون زايغة مش قادرة تواجه بعضها
الحضور اللي عدمه أرحم بكتير

عن الحضور الباهت للإحساس الباهت ..

الإحساس اللي بيخليك تلف حوالين نفسك
الإحساس اللي يوجعك من كتر ما هو مش عارف يحسك
الإحساس اللي عدمه أرحم بكتير

عن الحضور الباهت للإحساس الباهت بالحياة الباهتة ..

الحياة اللي كنت فاكر إنه ماليها
الحياة اللي هو بيدخل يسحب منك حلاوتها
الحياة اللي من غيره أرحم بكتير

عن الحضور الباهت للإحساس الباهت بالحياة الباهتة والمشاعر الباهتة ..

المشاعر اللي كنت طاير بيها وفاكر إنك لامس السما
المشاعر اللي رسمها قدامك على إنها الجنة
المشاعر اللي هو أصغر من إنها يعرف قيمتها
المشاعر اللي عنده عدم فا إنت من غيره أحسن بكتير

عن الحضور الباهت للإحساس الباهت بالحياة الباهتة والمشاعر الباهتة اللي بتخرج من قلوب باهتة ..

قلوب كنت فاكر نفسك وحيد فيها
قلوب كنت فاكرها مليانة بحب زيك
قلوب الإحساس فيها معدوم كتير

عن الحضور الباهت للإحساس الباهت بالحياة الباهتة والمشاعر الباهتة اللي بتخرج من قلوب باهتة وناس باهتة مفيهاش حياة ..

ناس دخلت حياتك عشان تحس نفسها ملونة شوية
ناس جت عندك وشدتك زي بالظبط ما النار بتشد الفراشة وهي فكراها نور
ناس رسمتلك الضحكة .. ناس غشت في شكل قلوبها .. ناس جتلك تاخد منك حياة


بس لأنك أقوى من الناس الباهتة .. لأنك أنقى من المشاعر الباهتة .. ولأنك إنت إنت .. فالحضور الباهت كِمل بغياب.




ساره عاشور

ليست هناك تعليقات:

إرسال تعليق